Oleh : Manaor Sinaga (Putra Tanah Jawa)
Di tingki na robi, lobi hurang sampulu sia abad naung salpu, adong sada dolidoli na margoar Muha Sinaga borhat sian Samosir. Manaripar ma ibana tu Girsang (Girsang Sipangan Bolon / Parapat) holan marhitehon bulung sukkit na dipatupa gabe pangganti ni solu. Sian i, mangaliat ma ibana tu luat Tiga Dolok, sahat ro di Tano Jawa.
Di tingki i, nunga adong sada harajaon di Tano Jawa na pinarajai ni Raja Sitanggang, manang Tuan Raya Sitonggeng.
ADVERTISEMENT
SCROLL TO RESUME CONTENT
Songon halak na mardalan tu luat na dao jala naeng mangalului hangoluan di luat ni halak, laho ma Muha Sinaga mangadopi Raja Sitanggang. Naeng mangido ulaon ibana asa boi mangolu jala mangalului pangomoan di luat harajaon i.
Di mulana, mangarap do Sinaga asa dijalo ibana gabe sada sian hulubalang ni istana. Alai, didok Raja ma naung gok hulubalangna.
Nang pe songon i, adong dope sada ulaon na porlu hagogoon, i ma gabe paragat, mangalap nira sian hau enau asa dipatupa gabe tuak, siinumon ni Raja.
Olo ma Sinaga mangulahon ulaon i. Marbisuk jala marsitutu ma ibana mangulahon ulaonna di porlak, i ma inganan ni bagot na disadapna. Ganup ari, diboan ibana ma tuak na binoan tu istana laho mangalehon tu Raja.
Denggan situtu do hasil ni ulaon ni Sinaga.
“Tabo situtu do tuakmu on, Sinaga!” pujion ni Raja di sada borngin, tingki manginum tuak na imbaru na binoan ni Sinaga sian porlak.
Mardalan ma ari, salpu ma ari. Lam jonok ma pardomuan ni Raja dohot Sinaga, sahat ro di gabe marsahabatan nasida, songon hahaanggi. Ndang dipatuduhon Raja be Sinaga songon halak na asing, alai nunga gabe sada sian halak na jonok tu istana.
Alai, di sada tingki, mulai longang ma Raja ala lam moru godang ni tuak na binoan ni Sinaga sian na somalna.
Mangarimasi ma Raja. Didok rohana, na olo do Sinaga mangurangi godang ni tuak na diserahhon tu ibana.
Sinaga sandiri pe ndang sonang rohana. Longang do ibana, boasa tuak na sai lam moru.
Asa botoonna aha do na mambahen moru tuak i, di sada ari sengaja ro ibana tu inganan pangalapan tuak, lobi hatop sian na somalna.
Ndang sia-sia pangidaonna. Sian na dao, diida Sinaga piga-piga padidit na manginum nira na mambura sian hau enau na disadapna.
“Pantas ma moru tuakku! Ulaonmuna do on!” didok Sinaga, marnida padidit i.
Dung sae ulaonna, mulak ma Sinaga tu istana jala mangalehon tuak tu Raja.
“Raja, nunga huida aha do na mambahen moru tuakku. Piga-piga padidit do na manginum nira sian bagot na husadap,” hatana.
“O, songon i do? Ndang na ho sandiri na manginum tuakmu? Aha, boi do binatang i manghabishon tuak sahat songon i?” sungkun ni Raja, dohot roha na masi sangsi.
“Molo sintong binatang do na mambahen songon i, ingkon boi do ho mangatasi. Unang loas nasida torus mangganggu ulaonmu. Molo porlu, bahen akkal mu laho manangkup nasida,” tonahon ni Raja.
Manangihon tona i, satolop ma Sinaga songon na poda ni Raja.
Dung mulak tu jabuna, hundul ma ibana di jolo ni jabu sambil manginum kopi. Dipingkiri ibana ma dalan na denggan laho mangatasi padidit-padidit na sai manginum tuak hasil ni ulaonna.
“Aha do na ingkon hubahen asa unang be mangganggu padidit i jala manghabishon tuakku?” pingkiran ni ibana.
Dung leleng ibana marpingkir, jumpa ma sada dalan. Diputuskon ibana ma laho mambahen todik (perangkap) di dalan na somal dilewati padidit i laho tu bagot na diagat na. Dung sidung dipatupa, mulak ma Sinaga.
Dang sadia leleng dung dipasang, ro ma padidit i. Laos bikkas ma todik i, jala tarhapit ma, jala marsuara, “Tu ginjang pamiltikna, tu toru pangondotna. Haccit do hape na hapit,” ninna padidit i.
Mangaruar ma soarana, mangido pangurupion ibana di borngin i, jala sai tongtong ma songoni sahat tu torang ni ari.
Manogotna, di tingki lam jonok Sinaga tu inganan porlak pangalapan tuak, manangihon ma ibana soara na samar-samar sian arah todik na binahenna.
“Tok… tok… Sinaga, tulung paluahon ahu! Molo palua ho ahu sian todik on, gabe halak na sangap do ho jala dihormati. Hamoraon do na laho ro tu ho, songon godang ni imbulu na adong di pamatanghu!”
Manangihon soara i, tarsonggot ma Sinaga. Naeng botoonna sian dia do ro soara i. Hatop ma ibana mandapothon inganan ni soara i.
Lam tarsonggot ibana uju marnida sada padidit na tarhapit di todik na dipasangna i. Na lobi aneh, padidit i boi mangkatai songon jolma, jala manjanjihon hamoraon tu Sinaga molo dipalua ibana padidit i.
Ndang porsea situtu Sinaga di angka na niida dohot na nibege. Padidit na somalna holan marsuara “cit-cit” i, nuaeng boi mangkatai songon jolma jala manjanjihon hamoraon tu ibana.
Ala diida Sinaga na masa i songon sada na sumurung, diputuskon ibana ma laho paboahon tu Raja.
Hatop ma ibana mulak tu istana, ndang mamboan tuak songon na somalna.
Di tingki i, nunga hundul Raja di istana jala paima ro ni Sinaga. Uju diida Raja Sinaga ro marhutu tangan, hatop ma ibana manjou Sinaga.
“Sinaga, boasa ndang diboan ho tuak sadari on? Aha do na masa? Nunga ndang olo be ho mangula gabe paragat?” ninna Raja manungkun.
“Mauliate, Raja. Ndada songon i, Raja. Sintongna sadari on ndang adong tuak na huoban, alai sadari on nunga huboto jala huida aha na gabe parsabab ni habisna tuak i.
Saonari nunga tarhurung si tupai i, alai adong sada na songkal masa, padidit na tartangkup i boi mangkatai songon jolma. Didok ibana, ise pe na paluahon ibana, na laho mandapot pasu-pasu,” alus ni Sinaga.
“Ah, mangada-ada ma ho, Sinaga! Didia adong binatang na boi mangkatai? Tabo situtu do hata na binahenmu on! Pasti holan akal-akalanmu do i asa unang ahu mangarimasi ho ala ndang diboan ho tuak,” alus ni Raja, ndang porsea.
Marusaha ma Sinaga mambahen Raja porsea na ndang mangada-ada ibana.
“Molo ndang porsea Raja, beta ma hita tu inganan pangalapan tuak, asa marnida langsung. Alai, andorang so borhat hita, songon dia molo hita mambahen padan?
Molo sintong boi tupai i mangkatai, aha do na nilehon ni Raja tu ahu? Alai, molo ndang sintong hatangku, olo do ahu mansohot mangulahon ulaon on jala manadingkon istana,” didok Sinaga.
Manangihon hata i, lam tertantang ma Raja. Porsaya ibana na mangada-ada do Sinaga.
“Beta ma! Molo sintong boi tupai i mangkatai, satonga sian luat harajaonku lehononku tu ho!” alus ni Raja, dohot roha na porsea situtu na laho monang.
“Beta ma, Raja. Hita borhat tu inganan todik i asa boi Raja marnida jala manangihon sandiri aha na nidok ni padidit i,” alus ni Sinaga.
Hatop ma nasida borhat tu porlak, inganan ni Sinaga manadap bagot.
Uju nasida naeng sahat tu inganan i, tarbege ni nasida ma muse soara ni tupai i sian na dao.
“Tok… tok… Sinaga, tulung paluahon ahu! Molo paluahon ho ahu, gabe halak na sangap do ho…”
Manangihon soara i, hatop hohom ma Raja. Lam longang bohina, ala nunga diingot ibana padan na binahenna dohot Sinaga.
Na sintong do na nidok ni Sinaga. Molo diakui ibana hadadabu i, ingkon dilehon ibana satonga sian luat harajaonna tu Sinaga.
Dohot roha na ganggu, torus ma nasida mardalan sahat tu inganan todik. Di san, diida Raja sandiri sada padidit na tarhapit, jala manangihon soara na ruar sian pamangan ni padidit i.
Di pudina, ndang boi be Raja manjua sintongna. Nang pe songon i, marusaha do ibana manutup hasalaan dohot hadadabu di rohana.
Di pardalanan mulak tu istana, Raja mandok ai ndang tutu na masa i, jala diduga Raja holan akal-akalan ni Sinaga do i na mamangke angka hahomion.
Sian na masa i, mulai mardao ma pardomuan ni Raja dohot Sinaga. Nang pe songon i, torus do Sinaga mangulahon ulaonna, gabe paragat tuak di istana.
Marlainan dohot Sinaga na torus mangulahon ulaonna songon na somalna, sai marningot do Raja di halanguonna. Ndang sonang rohana ala ingkon mago satonga sian luat harajaonna ala ni padan taruhan i.
Ganup ari dohot tingki, sai mangalului do Raja dalan laho mangalahon Sinaga, jala asa mulak muse luat naung nitaruhon ibana.
RAJA SITANGGANG MAMBAHEN SADA AKAL ASA TALU SITUTU SINAGA
Di sada ari, jumpa ma Raja sada dalan na nidok rohana tantu boi mangalahon Sinaga.
Diboan ibana ma abit na rara, na bontar, dohot na birong. Abit i dipilin jala dung i dililit tu pungsu batang ni bagot na di alaman ni bagas ni Raja, asa sian na dao tarida songon sada ulok.
“Sahat tu tingki on, ingkon talu do ho, Sinaga! Luatku naung madabu tu tanganmu, ingkon mulak gabe hakku!” ngorom ni Raja, dohot roha na porsea situtu.
Dung dipastihon akal na binahenna nunga sae dipatupa, diparentahon Raja ma sada hulubalang laho manjou Sinaga asa ro tu alaman ni istana.
Dung sahat Sinaga tu istana, dijou ma ibana asa hundul jala manginum kopi rap dohot Raja. Marhata-hata ma nasida satongkin, andorang so Raja mamungka mangulahon akal naung direncanahonna.
“Sinaga, adong na naeng husungkun tu ho. Molo diida ho sada na adong di ginjang ni hau i, aha do na nidok roham?” sungkun ni Raja sambil manudu tu arah abit na tolu warna, di pungsu ni bagot na sengaja dibahen songon ulok.
Mangalihon panidaionna ma Sinaga tu arah na nipatudu ni Raja.
“Pangidaanku, ulok do i, Raja,” alus ni Sinaga dohot roha na tonang.
“Porsea do ho ulok i? Molo ndang ulok i sintongna, songon dia? Olo do ho mamulak muse luatku naung tabahen gabe taruhan hita piga bulan na salpu?” tantang ni Raja.
“Songon na huida, ulok do i, Raja. Molo ndang ulok i sintongna, olo do ahu mamulak muse luat i. Alai, molo sintong do na huhatahon, aha do na nilehon ni Raja tu ahu?” sungkun ni Sinaga muse.
Ala porsea situtu Raja tu akal na binahenna, mangalusi ma ibana mardongan pos ni roha.
“Molo sintong ulok do i, sude harajaon dohot pamarentahonku lehononku tu ho!” tegas ni Raja.
Tarsonggot ma Sinaga manangihon taruhan na balga i.
“Ndang berani ahu manjalo taruhan na balga i, Raja. Boasa Raja naeng manaruhon sude harajaon holan ala sada ulok?” sungkunna.
“Sintong do ahu, Sinaga! Molo ulok do i songon na nidok roham, sude harajaon on lehononku tu ho!” alus ni Raja dohot roha na tigor.
Di bagasan rohana, porsea situtu ma Raja na laho monang. Diboto ibana do na adong di ginjang ni hau i holan abit na tolu warna na sengaja dipatupa songon ulok. Di rohana, ndang tarbahen Sinaga monang di taruhan i.
Ala sai mandesak Raja, di pudina disatujui ma taruhan i. Asa dipastihon padan i diida torop halak, dijou Raja ma piga-piga hulubalang tu alaman ni istana.
Dung marpungu sude, lam porsea ma Raja naung jonok tu tanganna hamonangan i.
Dung i, diparentahon ibana ma sada sian hulubalangna manggaol abit na tolu warna na dililit tu batang ni hau kalapa i marhite sada galah.
Alai, masa ma sada na ndang hea dibayangkon Raja.
Tarsonggot situtu sude halak na adong di alaman ni istana. Satongkin andorang galah i mangonai abit na tolu warna i, tiba-tiba gabe sada ulok mangaluncur sian ginjang ni bagot tu alaman ni istana.
Ulok i hatop mangaliat jala manadingkon alaman ni istana.
Raja, Sinaga, dohot angka hulubalang na marnida na masa i, holan boi longang jala hohom.
Akal na nidok ni Raja na laho mamboan hamonangan, sasintongna gabe hataluon na lobi balga. Ndang holan satonga sian luat harajaonna naung nitaruhon, alai saonari sude harajaon dohot pamarentahonna nunga gabe taruhan.
Ndang boi be mangkatai Raja Sitanggang. Nunga talu ibana di taruhan na binahenna sandiri. Olo manang ndang, ingkon dijalo ibana sintongna bahwa harajaonna saonari madabu tu tangan ni Sinaga.
Dung salpu na masa i, mardongan lungun ni roha, borhat ma Raja Sitanggang rap dohot sandok pinomparna ruar sian istana. Jala ala ni maila, borhat ma nasida saluhutna manadinghon Tano Jawa.
Sian tingki i, mangihuthon barita na sumebar sian pinompar tu pinompar, pamarentahon di Tano Jawa maralih sian Raja Sitanggang tu Sinaga. Barita na didok halak, dung manadingkon tahtana dohot istana, borhat ma Raja Sitanggang tu luat Barus jala mian disan.
Songon i ma barita na nidokhon sian pinompar tu pinompar taringot pardalanan ni Sinaga sian Samosir sahat gabe pangarajai di Tano Jawa.
Sada turiturian na patuduhon habisuhon, habeguon, dohot pangalaho ni jolma na boi mambahen muba nasib ni dua halak: Sinaga, halak na mardalan tu luat na dao na marusaha mangalului hangoluan, dohot Raja Sitanggang, pangarajai na parpudi na mago harajaonna ala hasombongonna dohot haporsayaonna na so marujung.
Cataran : Turiturian on di baritahon muse mangihuthon barita na pinasahat ni pinompar Sinaga di Tano Jawa. Molo adong hasalaan manang na hurang sintong di bagasan pandohan ni barita on, hami rade manjalo pangalaho na denggan laho mambahen paimbaru, saleleng disokong data manang sumber informasi na sintong jala boi dipertanggungjawabhon.
Penulis : MS
Editor : Redaksi
Sumber Berita : Cerita Keluaraga/Oppung
